BATANG MAHILIG MAG-TANTRUMS, MAY POSIBILIDAD NA MAATAKE AT MA-STROKE PAGDATING NG 40’S

SPOILED  ba iyong baby?

Kung sasabihin mong sanay ang iyong anak na sinusunod ang bawat maibigan niya, nasisiguro kong napakalakas ng kanyang pag-iyak kapag sinabi mong ‘’hindi ko mabibili ang gusto mo, anak’  Pakiramdam kasi niya nang mga oras na iyon ay inaapi mo siya o hindi mo na siya mahal, kaya hindi mo ibinibigay ang gusto niyang pagkain o laruan. Bilang magulang, kahit alam mong kapos na ang pera mo ay magdedesisyon ka na lang na pagbigyan siya. Feeling mo kasi ay madudurog ang iyong puso kapag nakikita mo siyang lumuluha.

Pero, sa palagay mo ba ay nagiging mabuti kang magulang? Maaaring sa paningin ng ibang tao ay isa kang mabuting magulang dahil nagagawa mong magsakripisyo, ngunit, sa mga isinasagawang pagsasaliksik ay hindi makabubuti kung ang iyong anak ay mahilig magwala kapag hindi nasunod ang gusto.

Bukod sa hindi nila kayang tumanggap ng ‘no’ ay maaari pang magkaroon sila ng sakit sa puso kapag nasa 40’s na sila.

Para higit mong maunawaan ang aking sinasabi, makabubuti kung babasahin mo nang maigi ang artikulo na ito.

Sabi kasi ng mga mananaliksik, ang mga batang mahilig mag-tuntrums ay nagkakaroon ng sakit sa puso kapag nagkaedad na sila.

Sa pag-aaral ngang pinamunuan ni Dr. Allison Appleton, mula sa Harvard Medical School, 377 adults ang sumailalim sa emotional behavior test. Kahit nasa 40 na ang kanilang edad ay nagawa pa ring alamin ng mga doctor kung anon gang klase silang bata noon. At sa pagsasaliksik na iyon ay napagtantong ang mga batang mahilig magtantrums ay ang kalimitang nagkakaroon ng sakit sa puso sa kanilang pagtanda.

Kapag daw kasi umiiyak ang isang bata ay maaari siyang magkaroon ng toxic stress kaya maaapektuhan noon ang kanyang utak at katawan. Maaari ngang hindi iyon umepekto sa bata agad pero pagdating ng panahon ay maaapektuhan ang kanilang pinag-aralan, ugali at ang kanilang kalusugan. Kaya naman ang batang iyakin ay malaki ang posibilidad na sila ay magkaroon ng sakit sa puso, atakihin at magka-stroke.

Walang sinumang magulang ang hindi nagmamahal sa kanilang mga anak, kaya makabubuti na habang bata pa lamang sila ay alamin na natin ang mga bagay na makasasama sa kanila. Ang kalimitang pag-iyak ay magiging dahilan kaya sila maaaring atakihin o ma-stroke.

Ngunit, dahil hindi natin maibibigay sa kanila ang mga bagay na kanilang maibigan, makabubuti siguro kung mahinahon na lang natin na ipaliwanag sa kanila na hindi lahat ng ibigin niya ay maibibigay natin sa kanila.

O, kausapin mo ng masinsinan ang iyong anak para hindi na niya kakailanganin pang mag-tantrums kapag hindi mo naibigay sa kanya ang nais.