LABIS NA PAG-INOM NG GATAS AT PAGKAIN NG MATATAMIS, NAKAKA-ACNE

AYON sa pag-aaral, ang labis na pag-inom ng gatas at matatamis ay nakaka-acne.

Yak, hindi natin mapigilan ang mapangiwi kapag nakikita natin na ang isang tao ay mayroong sandamakmak na pimples. Ibig kasing sabihin nito ay mayroon siyang acne kaya naman ang balat niya ay pulang-pula at may malalaking tagyawat. Pakiwari nga natin minsan ay isa siyang monster dahil sa tingin natin ay napakapangit niyang nilalang. Ang mga tao naman na mayroong acne ay tila hindi na makatingin ng tuwid sa mga tao dahil alam nila na marami ang nandidiri sa kanila. Pakiwari kasi nila ay mayroon silang sakit na nakakahawa.

Kung iyong pagmamasdan, ang kalimitang nagkakaroon ng acne ay ang mga teenagers. Kaya naman, nawawalan sila ng self-confidence. Sa kanilang hitsura kasi ay tila napakaimposible na magustuhan pa sila ng kanilang crush.

Pero, bakit nga ba may mga tao na tinutubuan ng ganitong sakit gayung ang mga magulang naman nila ay makikinis. Maging ang kanilang mga nakakatandang kapatid at mga pinsan ay okay naman ang hitsura.

Ayon sa pagsasaliksik, ang mga taong tinutubuan ng ganitong sakit ay iyong mahihilig na uminom ng gatas at kumain ng iba pang matatamis na pagkain.

Kapag nakikita natin na namamapak ng asukal at panay ang kain ng chocolate at cake ang isang  tao, ang agad nating sasabihin sa kanya ay maaari silang magkaroon ng diabetes. Wala sa hinagap natin na maaari rin palang maging dahilan ito para magkaroon sila ng acne.

Sa 50 taon na pag-aaral ay napagtanto na ang mga pagkain na may high glycaemic index ay maaaring maging dahilan para magka acne ang isang tao.

O, ayaw mo bang magkaroon ng acne?

Kung ayaw mo na magkaroon ng nakakarinding hitsura, kinakailangan mong bawasan ang pagkain ng matatamis. Kapag kasi an gating kutis ay nagkaroon ng maraming sebum ay maaaring ma-build up ang mga dead skin cells. Dahil doon ay  maaari iyong bumara sa ating balat. Kungganoon ay mata trap ang mga pawis sa ating pisngi na magiging dahilan upang mangati ang ating pisngi. At ang magiging resulta noon ay magkakaroon ng acne ang isang tao o sandamakmak na pimples.

Hindi natin gugustuhin na ang anak natin ay magkaroon ng ganitong problema sa balat. Sigurado kasing bababa ng husto ang kanilang self-confidence, magkakaroon pa sila ng depresyon kapag nakaranas sila ng insulto buhat sa ibang tao o sa mga nagugustuhan nila. Kungganoon, mawawalan sila ng tiwala sa kanilang sarili na magiging dahilan pa para sila ay mabigo.

Kaya, bilang magulang, kailangan mong awatin ang iyong anak sa labis na pag-inom ng gatas at pagkain ng matatamis dahil maaaring maglaho ang kanilang kaguwapuhan  o kagandahan.