Batang pinipilit ubusin ang pagkain sa kanilang plato, lumalaking obese

AYON sa pag-aaral, ang mga bata na pinipilit ng kanilang mga magulang na ubusin ang kanilang pagkain na nasa kanilang pinggan ay ang mga batang may tendensiya na maging lumba-lumba sa kanilang paglaki.

Marami ang nagugutom kaya hindi dapat mag-aksaya ng pagkain, ito ang laging paalala sa atin ng ating mga magulang. Palagi rin nilang sinasabi na masusuwerte kayo dahil marami riyang hindi makayang pakainin ng mga magulang.

O, hindi nga ba, kapag nakikita natin na ang isang musmos ay namamalimos para lang may makain, parang nilalamutak ang ating puso. Iniisip natin na napakapalad natin at hindi tayo natulad sa kanila. Kaya naman bilang pakikisimpatya sa kanila, ang tangi na lang nating magagawa ay huwag mag-aksaya ng pagkain. Maliban siyempre sa bibigyan natin pagkain ang mga batang nagugutom.

Ikaw, nagagawa mo bang mag-aksaya ng pagkain?

Kung ikaw ang tipo ng tao na walang pakialam sa iba, tiyak ko na hindi mo nga pahahalagahan ang bawat butyl na iyong kinakain. Baka nga sabihin mo pa ngang, ‘pasensiya kayo, ako ang pinalad na makakain ng masasarap, eh.’ Ngunit, kung puso ka para sa mahihirap o kaya naman ay pinakikinggan mo ang bawat sinasabi ng iyong mga magulang, sigurado na hindi mo nanaisin na magtira ng pagkain sa’yong plato. Ang agad mo kasing maiisip ay marami ang nagugutom kaya hindi ka dapat mag-aksaya ng pagkain.

Pero, alam mo ba na may masama rin palang dulot kapag lagi mong inuubos ang pagkain na nasa iyong harapan?

Sa aking pagsasaliksik kasi ay napagtanto ko na maaaring ito pala ang maging dahilan para ikaw ay maging matabang-mataba o obese.

Kung parati mo kasing paiiralin ang guilt na iyong nararamdaman, maaaring kahit busog ka na ay pipilitin mo pa ring maubos ang pagkain na nasa iyong plato. Paano kapag naparami ka ng lagay? O kaya naman ay nabigyan ka ng sobra sa karaniwan mong kinakain?

Ah, tiyak na mapipilitan kang ubusin ito. Kahit feeling mo ay masuka-suka ka na ay sasabihin pa rin ng isipan mo na kailangan mo itong ubusin, magagalit sina mommy at daddy. Pagkatapos ay magpa-flash sa isipan mo ang mga batang walang makain.

Sa pagsasaliksik nga na isinagawa ni Katie LOth, dietician sa University of Minnesota na matatagpuan sa Minneapolis, U.S., kaya maraming teenager na matataba ay dahil sa kapipilit ng mga magulang na ubusin parati ang pagkain na nasa kanilang plato. Gaano man ito karami, kailangan nila iyong sinutin. Sa kanya ring pag-aaral ay kanyang napagtanto na kaya mas maraming lalaki ang matataba ay dahil karaniwang ang ama nila ang pumipilit sa kanila na ubusin ang kanilang pagkain.

Hindi naman siguro kaila sa’yo na stretchable ang ating bituka kaya kapag kumain tayo nang kumain kahit busog na tayo ay lalaki iyon at mas magkakaroon ng malaking espasyo para sa susunod nating pagkain.

Kung ang karaniwan nating kinukuha ay hindi na tayo nakararamdama ng kabusugan, maaaring kumuha pa tayo ng pagkain. Kung masosobrahan an gating pagkuha, kailangan natin iyong ubusin. Kapag nangyari iyon ay lalaki na naman an gating bituka at hindi na tayo makokontento sa ating kinakain sa susunod.

Kailan ba tayo hihinto sa pagkain? Ito ang karaniwang tanong na tila napakahirap sagutin kung nagugutom pa tayo o may tira pang pagkain sa ating plato.

Ikaw, pinipilit mo ba ang anak mo na ubusin lagi ang kanyang pagkain?