Alagang hayop, maaaring magkaroon ng cancer

AYON sa pagsasaliksik, ang mga alagang hayop ay maaaring magkaroon ng cancer dahil sa paninigarilyo ng kanyang amo.

Alam natin na ang paninigarilyo ay masama sa ating kalusugan ngunit kahit anong awat ang gawin ng mga tao sa kanilang  paligid, hindi ito magawang tigilan ng iba. Pakiramdam nila ay  kulang na kulang ang kanilang araw kapag hindi hindi siya nakakahithit ng sigarilyo.

Ikaw, mahilig ka bang manigarilyo?

Siguro naman ay alam mong, hindi lamang ang kalusugan mo ang nasisira, maging ang mga tao na nasa iyong paligid? At sa aking pagsasaliksik, napagtanto ko na kahit pala ang hayop ay maaaring magkasakit kung nanionigarilyo ang kanyang amo.

Alam na alam natin na ang aso ay ‘man’s bestfriend’ kaya lagi itong nasa tabi ng amo at ang mga pusa naman ay laging nakakandong o nasa paanan ng kanyang amo kaya hindi posibleng nagagawa niyang langhapin ang usok na nagmumula sa kanyang sigarilyo.

Kung minsan, kahit may sigarilyo na hinihithit ang amo, nagagawa pa rin niyang kargahin at lambingin ang kanyang alaga. Hey, kahit naman hayop ‘yan ay mayroon din silang ulong at baga. Maaari rin silang magkaroon ng lung cancer. Sabi nga, kapag mas maliit ang hayop ay mas sensitibo sila sa usok.

Sa pag-aral nga ng Tufts University na matatagpuan sa U.S., ang pusa na naninirahan sa mga chain smoker ay nagkaroon ng feline lymphoma, isa itong cancer sa dugo at immune system.

Ang usok kasi ng sigarilyo ay kumakapit sa balahibo ng hayop kaya kahit na hindi mo na siya karga ay malaki ang posibilidad na hikain siya roon o kung hindi naman ay magkaroon siya ng iba pang sakit. Kaya sana, pangalagaan mo ng husto ang iyong alaga. Hindi maaaring makukontento ka na lang na pinapakain at pinaliliguan siya. Intindihin mo din sana ang kanyang kalusugan.

Alalahanin mo, hindi siya makapagrereklamo na nahihirapan na siyang huminga dahil sa labis mong paninigarilyo.